СПОРТШЫЛАР – БӘСЕКЕ АЛАҢЫНДА
Елімізде салауатты өмір салтын қалыптастыру – бүгінгі күннің басты талабы. Оған спорт мерекесі аясында ауданда өткен спартакиада сөзіміздің жанды айғағы. Ондағы мақсат – «Шаңырақ» ХІІІ жазғы облыстық спартакиадасына Ұлытау ауданының құрама командасын жасақтау болды.
Бəсекелі сынды аудандық дене шынықтыру жəне спорт бөлімі мен «Ұлытау ауданының спорт орталығы» КМҚК ұйымдастырды. Ашылу салтанатына аудан əкімінің орынбасары Мақсұт Оспанов, аудандық дене шынықтыру жəне спорт бөлімінің бас маманы Мұхамеджан Еділбаев қатысып, спортшылар қауымын төл мерекелерімен құттықтады.
Спартакиадаға аудандық топ құрамына енетін кенттер мен ауылдардан спортшылар келіп, спорттың сегіз түрінен бақ таластырды. Нəтижесінде, шағын футболдан өткен турнирде Ұлытау ауылының командасы жүзден жүйрік шықты. Екінші орынға Жезді кентінің командасы табан тіресе, жүлделі үшінші орыннан Қарсақбай кентінің командасы көрінді. Қол күрестен өткен сында Қарсақбайдан келген сом білекті жігіттер бірінші орынды жеңіп алды. Екінші орынды Ұлытау азаматтары, үшінші орынды Егінді ауылының сайыпқырандары еншіледі. Үстел теннисінен тағы да қарсақбайлықтар үздік атанды. Ұлытаулықтар екінші орынға иеленсе, егінділіктер үшінші орынды қанағат тұтты. Жеңіл атлетикадан өткен байқауда ұлытаулықтар топ жарды. Екінші орынды қарсақбайлықтар еншілесе, үшінші орынға егінділіктер табан тіреді.
Сондай-ақ, жезділіктер шахмат, дойбы сайысында қарсылас шақ келтірмей, бірінші орынды жеңіп алып, Жезді абыройын асырды. Асық ату бойынша өткен бəсекеде егінділіктер жақсы көрсеткішке қол жеткізіп, бірінші орынды иеленді. Ал, тоғызқұмалақ ойынында қарсақбайлықтардың бəсі биік болды. Ұлағаты мол ұлттық ойынды өз мəнінде ойнап, бірінші орынды қанжығалады.
Сөйтіп, жалпы командалық есепте Қарсақбай кентінің командасы алға шығып, спартакиада жеңімпазы атанды. Екінші орын – Ұлытау ауылының, үшінші орын – Егінді ауылының құрамасына бұйырды. Сол секілді əр спорт түрінен бірінші орын алғандар облыстық спартакиаданың жолдамасын алды. Сонымен қатар, жеңімпаздар мен жүлдегерлер кубок жəне дипломдармен марапатталды. Осылайша, бұл спартакиадада Ұлытау ауданының құрама командасы жасақталды. Енді осы команда мүшелері алда өтетін облыстық спартакиадаға қатысып, бақтарын сынайды.
Қайрат ЖҰМАБАЙ.