Сәкен Бибосынов Токио Олимпиадасының қола жүлдегері атанды
52 келіге дейінгі салмақта Сәкен Бибосынов жартылай финалдық бәсекеде британиялық Галал Яфаймен жұдырықтасып, 3:2 есебімен жеңіліс тапты.
Бірінші раундта Бибосынов нокдаун алып, қарсыласы басым болды. Дегенмен кейінгі раундтарда қазақстандық боксшы белсенді болды. Бірақ төрешілер жеңісті ұлыбританиялыққа берді.
Бұған дейін Бибосынов ширек финалда Испания боксшысы Габриэль Эскобарды жарыс жолынан шығарған. Ал 1/8 финалда француз Билал Беннамды сенімді жеңген. Алғашқы кезеңде Пуэрто-Рико өкілі Янкель Ривера Фигероамен жұдырықтасып, 4:1 есебімен басым түскен еді.
24 жастағы Бибосынов — 2019 жылғы әлем чемпионаты мен 2021 жылғы Азия чемпионатының қола жүлдегері.
Еске салайық, бұған дейін Қазақстан құрамасының капитаны Қамшыбек Қоңқабаев жартылай финалда жеңіліп, қола медаль иеленген болатын.
