Pfizer екпесін салуға әзірлік жүруде

Еліміздің әр аймақтарында Pfizer вакцинасын салу басталды. Бұл вакцина негізінен 12 жастан 18 жасқа дейінгі балалар мен жасөспірімдерге, жүкті және бала емізетін аналарға салынбақ. Бұл істен біздің Ұлытау ауданы да қалыс қалмақ емес. Қазір ауданда аталмыш екпені алуға әзірлік жұмыстары қызу жүріп жатыр.

Аудандық санитариялық-эпидемиологиялық бақылау басқармасының басшысы Ерлан Танабаевтың айтуынша, қазіргі уақытта әлемнің 20- дан астам елінде 12 жастан бастап, жекелеген елдерде 3 жастан бастап (Қытай) және 5 жастан бастап (АҚШ) жасөспірімдерге екпе салу жүргізілуде. Біздің елімізде де 12-18 жас аралығындағы балалар мен жасөспірімдер, жүкті және бала емізетін аналар арасында коронавирус инфекцияның алдын алу үшін аталмыш екпенің қолжетімділігі қамтамасыз етілген.

– Қазақстанда коронавирус инфекциясына қарсы екпелер салу тегін жүргізіледі және ерікті болып табылады. Ал 12 жастан 17 жасқа дейінгі жасөспірімдерді вакцинациялауға ата-аналарының немесе олардың заңды өкілдерінің хабардар етілген жазбаша келісімімен ғана жол беріледі. Осы мақсатта бүгінде ауданымызда тұрғындармен түсіндірме жұмыстары жүргізіліп жатыр. Ал, аудандық білім бөлімінің басшысы Бағдат Әбдірайымовтың айтуынша, аудан мектептері бойынша 12 мен 17 жас аралығындағы 715 оқушы бар екен. Бірінші кезекте осы балалардың 16 мен 17 жастағылары екпе алады. Ол үшін әрине олардың ата-аналары мен заңды өкілдерінің арнайы жазбаша келісімі керек.

– Екпе салуға орай өткізіліп жатқан онлайн түсіндірме шараға аудан мектептері түгел қатысуда. Мектепке 12 мен 17 жас аралығындағы оқушылардың ата-аналарын да шақырттық. Мамандар оларға екпенің тиімділігін айтып, түсіндіруде, – дейді Бағдат Қабденұлы.

Орайы келгенде айта кетейік, жүкті және бала емізетін аналарға екпе төмендегідей жағдайларда ескеріліп салынбақ. Яғни, жүкті әйелдерге жүктілік мерзімі 16 аптадан асқан соң, бала емізетін әйелдерге бала емізу мерзімі 42 күннен асқан соң ғана екпе салынады – дейді мамандар.

Ізтай БЕЛГІБАЙҰЛЫ