ОЛИМПИАДА ҚЫЗЫҚТАРЫ: биылғы дода несімен ерекшеленді?

Төрткүл дүниенің назары Токио төрінде өтіп жатқан Олимпиадаға ауды. Биылғы дода – бұрынғыдан өзгерек. Ең алдымен, межелі уақытынан 1 жыл кейін басталғанын айта кеткен жөн. Әлемдік пандемияның салқыны ғой. Тарихқа зер салсақ, 1940 жылғы Олимпиада да Жапон жерінде өтуі керек болған екен. Бірақ, ІІ дүниежүзілік соғыстың басталуына байланысты Жапон императоры оны ұйымдастырудан бас тартқан. Хош, сонымен биылғы Олимпиадада қандай қызықтар болды? Шолып шығайық…

Өзбек спортшысы сенсация жасады

Әлемдік додада өзбекстандық таэквондошы Улугбек Рашитов Олимпиада чемпионы атанып, еліне алтын сыйлады. Оның бұл жеңісін нағыз сенсация деуге болады.

Әу баста спорт сарапшылары өзбекстандық боксшы алғашқы айналымнан өте алмай, еліне қайтады деп болжам жасаған. Өйткені, жеребе барысында оған қарсылас ретінде кіл мықтылар түскен еді. Әйтсе де, ол үш бірдей фавориттен басым түсіп, өзінің шын мықты екенін танытты.

Ол 3 дүркін әлем чемпионы, Олимпиаданың күміс (2012), қола (2016) жүлдегері Ли Дэ Хунды және әлем чемпионатының күміс жүлдегері, ирандық Хосэсейнин Мирхашимді тізе бүктірді. Финалдық кездесуде ағылшындық спортшы Бердли Синденмен кездесіп, оны айқын басымдықпен жеңді.

Улугбек – Өзбекстан тарихында таэквондодан әлемдік додада топ жарған алғашқы спортшы!

Судан қорыққан спортшы чемпион атанды

Олимпиадада 100 метрге брасс әдісімен жүзуден додаға түскен британиялық Адам Пити алтыннан алқа тағынды. Бір қызығы, ол бала кезінде судан қатты қорыққан екен.

«Бала күнімде судан қорқатынмын. Тіпті, жуынғым да келмейтін еді», – дейді спортшының өзі. Оның ата-анасы осы бір қорқынышын басу үшін жүзу спортына береді. Олардың үміті ақталды. Ұлдары қорқынышын басып қана қоймай, табысты нәтижелерге қол жеткізді.

Иә, Адам Пити 8 мәрте әлем, 16 мәрте Еуропа чемпионы атанған. 2016 жылы Риода өткен Олимпиада ойындарында екі мәрте рекорд жаңартып, алтын алған. Енді Токиода да топ жарып, 100 метр қашықтықты 57,37 секундта жүзіп өтті.

Бір үйден қос чемпион шықты

Токиода жапониялық Ута Абэ мен Хифуми Абэ дзюдодан Олимпиада чемпионы атанды. Олар – бір отбасының мүшесі, яғни, ағалы-қарындасты спортшылар. 52 келіге дейінгі салмақ дәрежесінде әйелдер арасында бақ сынаған Ута Абэ қарсыласы франциялық Амандин Бушардан басым түсіп, алтыннан алқа таққан болатын. Көп ұзамай оның ағасы Хифуми Абэ Жапония қоржынына алтын салды. Ол финалдық бәсекеде 66 келі салмақта сынға түсіп, грузиялық Вашу Маргвелашвилиді қапы қалдырды.

Ағайынды Ута мен Хифуми Абэлердің бір күнде жеңіс тұғырына көтерілуі – бір бұл емес. 2018 жылы Әзірбайжанда өткен әлем чемпионатында екеуі де алтын алған болатын. Жалпы, Олимпиада ойындарында ағайындылардың бір күнде алтын алуы бұрын-соңды тіркелмеген.

Ерте қуанып, ұятқа қалды

Нидерландиялық велошабандоз Аннемик ван Флейтен өзінің «жеңісіне» ерте қуанамын деп ұятқа қалды. Ол мәреге жеткен бетте қуаныштан төбесі көкке жеткендей болып еді. Артынан чемпионның басқа спортшы екенін білгенде есеңгіреп қалды.

Спортшының бұлай қателесуіне жарыстың бас кезінде жіберген қателігі себеп болған. Яғни, старт берілген кезде ол австриялық спортшы Анна Кисенхоферттің өзінен озып кеткенін байқамай қалған. Сондықтан, жарыс барысында, тек, соңындағыларға алаңдап, мәреге бірінші болып жеттім деп ойлаған екен. Ал, австриялық спортшы межелі жерге одан 1 минут бұрын жетіп қойған. Сондықтан, нидерландық спортшы екінші орынды қанағат тұтуға мәжбүр болды. Ол тілшілерге берген сұхбатында «Мен білмей қалдым ғой» деп қайталай берген.