Мереке мәртебесін асқақтатқан шара

Ұлытау аудандық орталықтандырылған кітапхана жүйесінде Тәуелсіз еліміздің тарихындағы ең қастерлі күндердің бірі – Қазақстан Республикасының Конституциясына 30 жыл толуына орай «Конституция – мәңгілік елдің тұғыры» атты заң сағаты өтті.

Іс-шарада кітапханашы Бақытгүл Бейбутова Конституцияның тарихына тоқталып, Тәуелсіз Қазақстанның қалыптасуындағы Ата Заңымыздың қадір-қасиетін кеңінен баяндады. Конституцияның құрылымы – 9 тарау, 99 баптан тұратындығы, онда мемлекеттің саяси-құқықтық жүйесі мен азаматтардың құқықтары мен бостандықтары қамтылғанын айтты. Бұдан кейін пікірталас, сұрақ-жауап ұйымдастырылып, заң қызметкерлеріне, ішкі саясат бөлімінің, прокуратураның, полицияның қызметкерлеріне заң аясында сұрақтар қойылды. Қатысушылар Конституцияның қоғамдағы рөлі, заң үстемдігі, құқықтық тәртіп, азаматтық құқықтар мен бостандықтар жайлы түсіндіріп, ой бөлісті.
Маңызды шараға Ұлытау ауданы прокуратурасының аға прокуроры Нұрдәулет Күнділдә, Ұлытау ауданы әкімі аппаратының мемлекеттік-құқық жұмыстары жөніндегі бөлімнің басшысы Қанат Бапов, ішкі саясат бөлімінің басшысы Азамат Каренов, Ұлытау ауданы полиция бөлімінің уақытша ұстау изоляторының бастығы Медет Үсенбаев, «Ұлытау» газетінің бас редакторы Қайрат Жұмабаев, Ұлытау ауданының Қорғаныс істері бөлімінің бөлімше бастығы, сержант Асылжан Қайсар, Ұлытау аудандық тарихи-өлкетану музейі басшысының міндетін атқарушы Батырлан Бегаев қатысып, Қазақстанның әр азаматы еліміздің Негізгі заңының асқақ рухы мен маңызын, оның қалыптасу тарихын жақсы білу керектігін түсіндірді.
Бұл жолғы басқосу Ата Заңымыздың, мемлекетіміздің құқықтық және саяси жүйесіндегі айрықша рөлін дәріптейтін, азаматтардың құқықтық сауаттылығын арттыруға, жастарды отансүйгіштікке тәрбиелеуге арналған тағылымды іс-шара болды.
Үстел басында Конституция – еліміздің демократиялық дамуы мен тұрақтылығының кепілі екендігі айтылып Ата Заңымыз кең тұрғыда насихатталды. Шара соңында, Ұлытау ауданының орталықтандырылған кітапханалар жүйесінің директоры Салтанат Ниязова сөз сөйлеп, келген қонақтарға алғысын білдірді.

Гүлім БАЙМАҒАНБЕТОВА,
аудандық орталықтандырылған кітапханалар жүйесінің әдістемелік-библиографиялық бөлім меңгерушісі.