Мәртебесі биік сайыс

Ұлы ойшыл Абайдың 175 жылдық мерейтойы аясында аудандық Мәдениет және тілдерді дамыту бөлімінде ауқымды шаралар іске асуда. Соның бірі – Салтанат Ниязова басқаратын кітапханада өткен «Асыл сөзді іздесең, Абайды оқы, ерінбе!» атты зияткерлік сайысы. Бұл сайыс Абайдың шығармашылық мұрасын кеңінен насихаттауға бағытталды.

Шараның мақсаты – дана Абайдың тағылымды жолын дәріптеп, жастарға үлгі-өнеге ету.

Сайыс барысында мұғалімдер, экономистер, студенттер үш командаға бөлініп, бес кезең бойынша бақтарын сынады. Бірінші кезең – команда құрамын таныстырудан басталды. Екінші кезең – ұяшықтағы сандарды таңдап, сұрақтарға жауап берумен жалғасты. Ұсынылған сұрақтар Абай өмірі мен шығармашылығы жайында болды. Үшінші кезеңде Абай қара сөздерін, өлеңдерін жатқа оқудан сынға түсті. Бұл кезеңде қатысушылар осалдық таныта қойған жоқ. Барынша Абай өлеңдерін мәнерлеп оқып, қара сөздерін келістіре өрбітіп, әсерлі жеткізуге тырысты. Төртінші кезеңде Абай лирикасына тоқталып, ақын өлеңдерінің тақырыбын қазақ, орыс, ағылшын тілдерінде жазып шығудан жарысты. Бесінші кезеңде экранда көрсетілген әріптер бойынша хәкім Абайдың даналық сөздерінен үзінді келтіре отырып, диалог түрінде әңгіме өрбітті.

Шара аясында Абай өмірі мен шығармашылығынан жасақталған кітап көрмесі де ұйымдастырылды. Сонымен, қазылар қорытындысына сәйкес, жүлделі үшінші орын – студент жастардың «Ұлар» командасына бұйырды. Екінші орын – «Жұмыспен қамту» бөлімінің «Қыран» командасына берілді. Ал, бірінші орынды аудандық Оқушылар үйінің мұғалімдері арасынан құрылған «Бүркіт» командасы жеңіп алды.

Шара соңында жеңімпаз бен жүлдегерлер грамоталармен марапатталып, ақшалай сыйлықтарға ие болды.

Қайрат ЖҰМАБАЙ