ҰЛЫТАУ: Жаңа әкім тағайындалды
Қазақстан Республикасы Президенті Әкімшілігінің келісім беруі және аудандық мәслихат депутаттарының келісімі негізінде Қарағанды облысының әкімі Жеңіс ҚАСЫМБЕКТІҢ өкімімен Ұлытау ауданының әкімі лауазымына Советбек МЕДЕБАЕВ тағайындалды. Жаңадан тағайындалған әкімді аудан активіне облыс әкімінің орынбасары Абзал НҮКЕНОВ таныстырды. Актив жиынына ауданның бұрынғы басшысы, ҚР Парламенті Мәжілісінің депутаты Берік ӘБДІҒАЛИҰЛЫ қатысты.
Басқосудағы өзінің кіріспе сөзінде Абзал Нүкенұлы Ұлытаудың ұлт тарихындағы ұлық мәртебесін айрықша атап өте келіп, қастерлі өңірдің одан әрі өркендей түсуі мемлекеттік тұрғыда маңызды мәселе екендігіне назар аударды. Сол мақсаттағы кешенді жоспарлардың жүйелі негізде жүргізілуін облыс әкімінің тікелей әрі тұрақты түрде бақылауда ұстап отырғанын тілге тиек етті. Советбек Тұрсынұлының өмірдеректерімен таныстырып, алдағы жауапты қызметіне сәттілік тіледі.
Жиында сөз алған Берік Әбдіғалиұлы ауданды өзі басқарған кезеңдегі атқарылған істер ауқымына қысқаша шолу жасап, оларды жүзеге асыру негіздемелері мен тиімділігіне қатысты сөз қозғады. Ол сонымен қатар, ілгері басу бағытында қолға алынуы межеленген қадамдар хақында да ой толғады. Берекелі негізде басталған бәтуалы жұмыстардың тындырымды тиянақталып, тың жоспарлар ілкімді негізде түзіле береріне үміт артатынын, солардың сапалы атқарылуына пейілді бола беретінін айтты. Сол арқылы өзін Ұлытау өңірінің сұраныстары мен аудан халқының талап-тілектерінен ешқашан алшақ ұстамайтынын айқын аңғартты.
Ауданның жаңадан тағайындалған әкімі Советбек Медебаев жоғары деңгейлі атқарушы билік пен жергілікті мәслихаттар депутаттарына көрсеткен сенімі үшін алғыс айтып, ортақ мүдде тұрғысындағы оралымды істердің орнықты атқарылуына бар білімі мен білігін, қажыры мен қайрат-жігерін аянбай жұмсайтынын мәлімдеді.
Жалпы жұртшылықтың атынан сөз алған қадірменді қария, аудандық Қоғамдық кеңестің төрағасы Жақия Садықов елдің көкейіндегі түйткілді жайттарды тізбелей келіп, олардың түйінін тарқату қажеттілігі хақында ұсыныс енгізді. Жаңа әкімнің қызметіне сәттілік, толайым табыс тіледі.
Ахат ҚҰРМАНСЕЙІТ
