ҰЛЫТАУ: Үздіктерге құрмет көрсетілді
Аудан әкімі – «Nur Otan» партиясы аудандық филиалының төрағасы Советбек МЕДЕБАЕВ Мәдениет және өнер қызметкерлері күні мерекесіне орай, партия филиалы ғимаратында өңір мәдениеті мен өнерінің өркендеуіне үлес қосып жүрген бір топ қызметкерлерді қабылдады. Мерейі өскен жандарды төл мерекелерімен құттықтап, тың шығармашылық табыс тіледі.
Қабылдау барысында Советбек Тұрсынұлы сала мамандары мен шығармашыл тұлғалардың қоғамның рухани тұрғыда ілгерілей түсуіне қосып жүрген үлесі қомақты екенін аса ризашылықпен атап өтті. Еселі еңбек нәтижелеріне лайықты баға бере келіп, марапаттар тапсырды.Соның аясында Борсеңгір ауылдық кітапханасының қызметкері Гауһар Баймағанбетова мен Қаракеңгір ауылы клубының мәдени шараларды ұйымдастырушысы Жақсыбек Бижігітов аудан әкімінің Құрмет грамотасымен марапатталды. Ал Жезді кенті мәдени-сауық орталығының қызметкері Азамат Смағұлов, Қоскөл ауылы клубының әдіскері Гүлшат Тоғызбаева және Қорғасын ауылдық кітапханасының қызметкері Қадиша Мағзұмова аудан әкімінің Алғыс хатын алды.
Марапат иелері өз кезегінде аудан басшысына шынайы ілтипаты мен қапысыз қолдауы үшін алғыстарын айтып, алдағы уақытта да мәдениет саласын одан әрі дамыту бағытындағы жұмысты жүйелі негізде жүргізе беруге әзір екендіктерін мәлімдеді.
Жасұлан АЯШЕВ.
