«Ұлытау. Ұлық ұлыс» деректі фильмі жарыққа шықты
«Қазақпарат» ХАА қарасты «Qazaqstan tarihy» порталы Алтын Орданың 750 жылдық мерейтойына арналған «Ұлытау. Ұлық ұлыс» деректі фильмін жарыққа шығарды. Басты мақсат — Ұлытау өңіріндегі ұлтымызға мұра болып қалған киелі жерлерді дәріптеп, туристердің көптеп келуіне қолдау көрсету. Фильм екі бөлімнен тұрады. Бұл туралы e-history.kz хабарлады.
Аталған фильмде Қарағанды облысы Ұлытау ауданының киелі жерлері мен Едіге есімін алған таудың төбесінде жерленген Едіге, Тоқтамыс, одан бөлек, Жошы хан, Алаша хан және өзге де тарихи тұлғалардың кесенелері, Хан ордасы, Әулиетау (ақмешіт) сынды қасиетті орындар көрініс тапқан. Сондай-ақ Ұлытау ауданының орталығы Ұлытау ауылы да бейнеленген.
Айта кетер болсақ, өткен жылы ҚР Президенті Қасым-Жомарт Тоқаев ұлт ұясы Ұлытауға барған сапарында Жошы хан есімін жоғары деңгейде ұлықтау шарасын жеделдету керектігін айта келе, Алтын Орда (Ұлық ұлыс) империясының 750 жылдық мерейтойын мерекелеу туралы бастама көтерген. Сондай-ақ Мемлекет басшысы Ұлытауды халықаралық деңгейдегі этнографиялық туризм орталығы ретінде насихаттауды баса айтқан еді.
Соның арқасында Ұлытау ауданындағы Жошы хан кенесесінің іргесінде тарихи-мәдени кешен құрылысын бастады. Жошы және Алаша хан кесенесінде ғылыми-реставрациялау жұмыстары жүргізілді. «Ұлытау» визит орталығы салынып, пайдалануға жақын қалды.
Фильмді түсіру кезінде көмек көрсеткен Қарағанды облысы әкімдігінің ішкі саясат басқармасына алғыс білдіреміз!
