Ұлытау ауданының фермерлеріне қолдау көрсетіледі
Ұлытау ауданында ТЖ алдын алу және жою бойынша аудандық комиссия жұмыс істейді. Ауданда барлығы 39 жер пайдаланушы зардап шекті. Олардың жайылымдары өртенді және шаруа қожалығының бір басшысы 318 бас малынан айырылды.
Қарағанды облысы әкімінің орынбасары Серік Шайдаров зардап шеккендердің қайсысына және қандай қолдау көрсетілетінін түсіндірді.
Әкім орынбасары фермерлермен, оның ішінде малы қырылған шаруа қожалығының басшысы Сағынтай Әбдібековпен кездесті. Тәуелсіз сарапшы фермердің шығынын бағалайды. Нарықтық құны бойынша өтемақы төленеді.
– Мен мал шаруашылығымен 1996 жылдан бері айналысамын. Осындай жағдай біздің фермада алғаш рет болды. Өрт тез тарады. Жел екпінді болып, бағытын өзгертті. Біз тіпті малды қауіпсіз жерге шығарып үлгермедік, – дейді Сағынтай Әбдібеков. – Бәрі ойдағыдай болады деп үміттенемін. Облыс әкімінің орынбасары, жергілікті әкім, аудан басшысы да менімен байланысқа шықты. Көмектесуге уәде берді. Қиындықта қалдырмағандарыңызға үлкен рахмет!
Жайылымдық жерлер мен шабындық жерлерден айырылған фермерлерге де қиын жағдайдан шығудың шешімдері ұсынылды.
– Қазір ауданның көптеген фермерлері зардап шеккен фермерлерге шөп шабу және мал жаю үшін өз жерлерін беруді ұсынады – бұл бір шешім. Екіншісі – бір жылға өтеусіз мемлекеттік жер бөлеміз. Мұндай шартты жасауға Жер кодексі мүмкіндік береді, – деп түсіндірді Серік Шайдаров.
Ұлытау ауданында барлық табиғи өрттер жойылды.
