Ұлық мереке ұйымшылдықпен өтті
Ұлытау ауданының тұрғындары Наурыз мейрамын ұйымшылдықпен атап өтті. Ұлық мерекеге орай орталық алаңда киіз үйлер тігіліп, ұлттық салт-дәстүрлер кеңінен насихатталды. Ақ сақалды қарияларымыз елге батасын беріп, түрлі ұлттық ойын түрлерінен жарыс ұйымдастырылды.
Ұлыстың ұлы күнін зор ілтипатпен қарсы алуды дәстүрге айналдырған ұлытаулықтар биылғы мейрамда Ұлытау селосында 11 киіз үй, ал, жалпы аудан бойынша отызға жуық киіз үй тігіп қарсы алды. Бұл үйлердің әрқайсысына мағыналы атау беріп, сыртын ою-өрнекпен әсемдеп, ішін асқа толтырған. Бауырсақ, құрт-ірімшік, қымыз, шұбаттан және еттен жасалған ұлттық тағам түрлері мол жайылған ақ дастарханның сәнін келтірді. Боз үйге кірген меймандарға мерекелік дастарханнан дәм ұсынылды. Сондай-ақ, тұрғындарға наурыз көже, бауырсақ пен палау тегін таратылды.
Мерекелік шарада Ұлытау ауданының әкімі Аманжол Мырзабеков жиналған қауымды құттықтап, жылы лебізін білдірді. Сонымен қатар, ауданның дамуына үлес қосқан азаматтарды марапаттады.
2023 жылдың 15 ақпандағы ҚР Президентінің Жарлығы бойынша көп балалы ана Мөлдір Жаппасоваға «Күміс алқа» табысталды.
Ұлытау ауылдық округі әкімі аппаратының қызметкері Темірбек Байболов, «Тасбұлақ» ЖШС-нің ауыр техника жүргізушілері Берік Баймұханбетов пен Бауыржан Досанов Аудан әкімінің «Алғыс хатына» ие болды.
Бұдан кейін аудандық мәдениет үйі қызметкерлерінің дайындаған театрландырылған қойылым көрсетіліп, мерекелік шара концерттік бағдарламамен жалғасты. Сонымен қатар, аудандық дене шынықтыру және спорт бөлімінің ұйымдастырған спорттық іс-шарасы да өткізілді. Аудан тұрғындары «Қошқар көтеру», «Аударыспақ», «Арқан тартыс», «Қазақша күрес» сынды түрлі ұлттық спорт түрлерінен ұйымдастырылған жарыстарға белсене қатысты. Жүлделі орын алғандарға ақшалай сыйақы мен бағалы сыйлықтар берілді. Демеушілер де қолдауларын аямады.
Ұлыстың ұлы күніне орай, Ұлытау төрінде ұйымдастырылған іс-шара тай жарыспен жалғасып, үздіктер марапатталды. Бұдан бөлек, ауыл азаматтарының ұйымдастыруымен ат жарыс та өткізілді.
Жалпы, айтқанда мерекеге аясында өткізілген спорттық сайыстарда ауыл азаматтары Ерболат Жарасбаев, Дәурен Байболов, Жасұлан Мұханбетов және басқа да азаматтар демеушілік жасап, мәрттік танытты.
Ұлыстың Ұлы күніне балаған Наурыз мерекесі ауданымызда жоғарғы деңгейде аталып өтілді.
