«Kitap Time – 2023» фестивалі өтті
Ұлытау аудандық орталық кітапханасында кітап оқуды кеңінен насихаттау, интеллектуалды жастарды ынталандыру, мəдени құндылықтарымызды халыққа жеткізу мақсатында «КітаpTime – 2023» ІІ жалпы Республикалық кітап фестивалі өтті.
Фестиваль түрлі форматты қамтыды. Атап айтсақ, іс-шара «Библиокафе» таныстырылымымен басталды. Онда кітаптар 4 бөлімге бөлінді. Алғашқы бөлімде М.Əуезовтің «Абай жолы», І.Есенберлиннің «Көшпенділер» кітаптары ұсынылса, екінші бөлімде Джоджо Мойес «До встречи с тобой», Данияр Жігітбек «Лайфхактар», Зияш Телеуова «Бет перде» сияқты заманауи кітаптарға шолу жасалды. Келесі бөлімде кітапханашылар «Пайдалы кеңестер», «Қазақстан əйелдері» журналдары мен «Три задачи», «Іскер аюлар отбасы» кітаптарына тоқталды. Одан кейін кітапхана оқырмандарына кітап, кітапхана туралы «Quiz» интелектуалды алаңында библиовикторина ойыны ойнатылды. Онда оқырмандар 2 топқа бөлініп, ұпай жинау арқылы жарысты.
Іс-шара кітапхана ішінен ашылған «Шебер қолдар» үйірмесі жəне аудандық балалар кітапханасының «Балбұлақ» қызығушылық клубының шеберлік сағатымен жалғасты. Шеберлік сағатта оқырмандар күз мезгіліне байланысты «Күзгі бақтағы қолшатыр» атты қолөнер жұмысын жасады.
«Кітаp Time – 2023» іс-шарасы өз жалғасын «Білгенге маржан» атты мақал-мəтелді жалғастыру, жұмбақты табу, «Жас суретшілер» үйірмесі оқырмандарының сурет салуымен жəне ертегі көрсетілімімен жалғасын тапты. Сурет үйірмесінің оқырмандары ақ қағазға сүйікті жануарларының суретін салды. Одан кейін оқырмандар «Əке мен бала» атты ертегі көрсетілімін тамашалады. Фестиваль балалар кітапханасының тұрақты оқырманы Кəусар Нұржанқызының орындауындағы «Біз – бақытты баламыз» əнімен тəмамдалды.
Фестиваль оқырмандарға кітапхананың маңыздылығын, кітап оқудың пайдасын түсіндіріп, уақытын тиімді өткізуіне ықпалын тигізді.
Марина ЕЛЕУОВА,
Ұлытау аудандық балалар кітапханасының библиографы.
