Әкімшілік істер қозғалды

Ресми дерек көздерінің мәліметіне сүйенсек, қазіргі таңда Қарағанды облысы аумағында карантиндік шектеу шараларының сақталуын бақылайтын 111 мониторингтік топ жұмыс істейді. Олар 1-9 наурыз аралығында 2492 нысанды тексеріп, ортақ талапты бұзудың 61 оқиғасын анықтаған.

Мұндай жағдайлар банкет, үйлену тойын өткізу мен қоғамдық тамақтану нысандарыныңтыйым салынған уақыттан кейін жұмыс істеуі және басқаларға қатысты тіркелген. Мәселен, Қарағандыда «Oblako» бары, «Janym Soul» караокесі және «Еуропа» мейрамханасында бұзушылықтар анықталған.

Сонымен қатар, Теміртауда жаппай отбасылық іс-шараларды өткізуге тыйым салынғанына қарамастан, «Эсмиралда» және «Айтас» кафелерінде үйлену тойлары өткізілген. Әлеуметтік қашықтықты сақтамағаны үшін «Бейбуд» кафесінің қызметі тоқтатылды. Ал Жаңаарқада «Azan» кафесінде талапты бұзушылық тіркелді.

Тиісінше, аталған жайттар негізінде ҚР «Әкімшілік құқық бұзушылық туралы» Кодексі 425-бабының 1-тармағы бойынша әкімшілік істер қозғалды.

Өз тілшімізден.