Келісті істер көңіл тоғайтады

Ауыл әкімінің жылдық есеп беру кездесуіне қатысу үшін Қорғасынға арнайы барған аудан әкімінің орынбасары Нұржан ОРЫНБАЕВ алғашқы кезекте ауызсу және электр қуатын беру желілерінің жай-күйімен танысты. Бұдан кейін «Жұмыспен қамтудың жол картасы — 2020» бағдарламасы аясында күрделі жөндеуден өткен мәдениет үйінде Шеңбер ауылдық округінің әкімі Сағат СҰЛТАНОВ жыл көлемінде атқарған жұмыстары жөнінде ауыл тұрғындары алдында есебін берді.

Ақиқатын айту керек, өткен жыл мұғдарында Қорғасын ауылында атқарылған айтулы шаруалар баршылық. Жергілікті тұрғындар аудан әкімінің жас кәсіпкерлерді қолдау мақсатында бөлінген грантының игілігін көре бастады. Соның нәтижесінде екі азамат жаңадан монша салды. Аталған жоба аясында Жанар Күнтуған кондитер цехын ашып, жерлестерінің сұранысын өтеуге кірісті.

«Дипломмен – ауылға!» бағдарламасымен бір отбасы қаладан көшіп келіп, қоныстанған. Ауыл тұрғындары округ әкімінің ұтымды әрекетінің арқасында интернет желісі қызметін оңтайлы пайдаланып отыр. Қазір «Билайн» ұялы байланыс операторының қондырғысы орнатылу үстінде. Демек, жуыр маңда ауылдағы ағайын, алыстағы туыс-туған, дос-жарандарымен кедергісіз байланысқа шығу мүмкіндігіне қол жеткізеді. «Қатысу бюджеті» қаржысы есебінен ауылдағы саябақтың сыртқы қоршауы жаңартылған. «ДИАС» және «Смағұл А» жеке шаруа қожалықтарының жетекшілері Жаңабай Түскеев пен Бақтияр Смағұлов кіреберіс жол бойына түн мезгілінде жарық беріп тұратын «Мен сені жақсы көремін, Қорғасын» иллюминациялық жазу-белгісін орнатқан. №2 Қорғасын орта мектебі ауласына қойылған білім ошағының негізін қалаушы әрі алғашқы мұғалімі Сөлиақас Оспановқа қойылған ескерткіш-мүсін – өткен жылдың жағымды жаңалығының бірі.

Басты қажеттілік – ауылды ауданмен байланыстыратын бұрылыс жолды талапқа сай жөндеу жұмыстары бастау алды, ол биылғы жылы тиянақталуы тиіс. Осы тектес көңілді тоғайтар келісті істер – елдің ымыра-бірлігінен бастау алатын берекелі тірліктің айғағы.

Жүзеге асырылған жұмыстармен қатар, алдағы жоспарлы шаралар хақында кең көлемді мәліметтер ұсынған әкім есебінен соң тұрғындар сауалына ден қойылып, жауап қайтарылды. Ауылдағы ардагерлер кеңесінің төрағасы Хасен Әбдірахманов пен еңбек ардагері Жұмағат Сартаев ауыл басшысының атқарған жұмысына көңілдері толатыны туралы айтып, қызметіне оң баға берді.

Есепті кездесу түйінінде Нұржан Орынбаев алдағы міндеттер хақында сөз өрбітіп, тұрғындарға бақуатты ғұмыр тіледі.

Жасұлан АЯШЕВ

ҚОРҒАСЫН ауылы.