Күн тәртібінде – маңызды мәселе
Ұлытау ауданының әкімдігінде аудан әкімі аппаратының басшысы, Әдеп жөніндегі уәкіл Думан ЖҰМАНОВТЫҢ төрағалығымен «Сыбайлас жемқорлыққа қарсы іс-қимыл» тақырыбында Zoom платформасы арқылы онлайн бейнеконференциясы өтті. Маңызды жиында бүгінгі күннің ең өзекті мәселесі саналатын тақырып төңірегінде кең көлемді әңгіме өрбіді.
Бейнеконференцияға облыс әкімі аппаратының Әдеп жөніндегі уәкілі Гүлнар Қабдыкәрімова, Қарағанды облысы кәсіпкерлер палатасы директорының құқық мәселелері жөніндегі орынбасары, облыстық Әдеп жөніндегі кеңестің мүшесі Әлхайдар Асқаров, ҚР Мемлекеттік қызмет істері агенттігінің Қарағанды облысы бойынша департаментінің бас маманы Бахтияр Макеев, облыстық сыбайлас жемқорлыққа қарсы іс-қимыл департаменті превенция басқармасының бас маманы Әкім Сақтапберген, Жезқазған аймағы бойынша сыбайлас жемқорлыққа қарсы қызмет басқармасының аса маңызды істер жөніндегі офицері Айдын Құрманәлиев, Ұлытау ауданы прокуратурасының прокуроры Сырлыбай Байбосын, ауданның мемлекеттік мекемелерінің басшылары, кент және ауылдық округтерінің әкімдері мен БАҚ өкілдері қатысты.
Күн тәртібіндегі сауалға байланысты аудандық кәсіпкерлік бөлімінің басшысы Гүлнар Ауғанова, аудандық жұмыспен қамту орталығының басшысы Баянқұл Аманжолов, Қаракеңгір ауылдық округінің әкімі Жалғас Төре және Борсеңгір ауылдық округінің әкімі Бауыржан Әлімбек хабарлама жасады.
Конференция барысында Гүлнар Райымқұлқызы мен Бахтияр Мағзұмұлы мемлекеттік қызмет туралы заңнамаға енгізілген өзгерістер туралы, сондай-ақ, қызметшілердің қызметтік әдеп нормаларын сақтау мәселелері жөнінде ақпарат берді.
Ауданда сыбайлас жемқорлыққа қарсы «Адалдық алаңы», «Ашық бюджет» жобаларына қатысты іс-шаралар әлеуметтік желілерде халық назарына тұрақты түрде ұсынылып келеді. Олардың негізгі мақсаты – жағымды мінез-құлық үлгісін одан әрі өрістету, жемқорлыққа жол бермеу, сонымен қатар, қоғамдық «дертке» қарсы мәдениетті қалыптастыру.
Онлайн жиын қорытындысында қарастырылған тақырып аясында тиісті тұжырымдар жасалды.
Жасұлан АЯШЕВ
