Өңір дамуы – өзекті мәселе
Ұлытау облысының әкімі Дастан Рыспековтің төрағалығымен кезекті аппарат жиыны өтті. Кеңесте алдағы жылыту маусымына дайындық және «Ұлытау» әлеуметтік-кәсіпкерлік корпорациясының» атқарылған жұмыстары мен алдағы жоспары туралы мәселелер қаралды.
Өңір басшысы облыстағы әлеуметтік нысандарда былтырғы қателіктерге жол берілмеуін қатаң ескертіп, мекемелердің қысқа әзірлік паспорттарын 10 қыркүйекке дейін өткізу міндетін жүктеді. Бұл ретте облыс әкімі дайындық шаралары лайықты деңгейде жүргізілмеген жағдайда жауапты басқармалардың басшыларына тек ескертумен шектелмейтіндігін атап өтті.
Сонымен қатар өңір басшысы энергетика басқармасының апта сайын жылу беру кәсіпорындарына бақылауға барып, мұқият қадағалап тұруы қажет екенін жеткізді. Онымен қоса, қала және аудан әкімдеріне жылу жүйелерін жуу сондай-ақ жылу тұтыну қондырғыларын қысыммен тексеру жұмыстарын дереу бастау тапсырылды.
Кеңесте облыс әкімі әлеуметтік маңызы бар тауарлар бағасының қымбаттауына талдау жасап, бір аптаның ішінде көрсетуді тапсырды. Сондай-ақ инвестиция тарту, туризмді дамытуға қатысты маңызды сұрақтар да назардан тыс қалмады. Бұл ретте өңір басшысы облыс әкімінің орынбасарына ӘКК-мен бірлесіп, іске асырылып жатқан инвестициялық жобалар бойынша күтілетін жұмыс орындарының санын бағалап, оларды облыс тұрғындарына ұсыну шараларын бақылауға алу қажеттігін жеткізді.
Сонымен қатар, Сәтбаев қаласында жүзеге асып жатқан индустриалды аймақтың облыс үшін маңызы атап өтіліп, оның іске уақытылы қосылуын қатаң бақылауда ұстау міндеті жүктелді.
