Газет осылай шыққан еді

Мерзімдік уақытпен өлшегенде, сексен жылға ұласқан ғұмыр, шамамен үш ұрпақ алмасатын өмір. Шыға бастағанына сол сексен жыл толған «Ұлытау» газеті үш ұрпақтың да, саяси, әлеуметтік және экономикалық үш кезеңнің де тағдыры мен талайын бейнелейді.

1939 жылы Ұлытау ауданы құрылған кезде оның саяси-әлеуметтік жағдайы мен паритяның саясатын қалың бұқараға насихаттайтын, елді партия мен ленинизм идеяларына жұмылдыратын идеялық-ақпарат құралы қажет еді. Бұл заңдылық та. Сол кездегі талап бойынша әр партия комитетінің өз органы болуы керек еді. Осы мақсатта аудандық партия комитетінің бюро қаулысына сәйкес аудандық газет ашу туралы қаулы шыққаны аян. Өкінішке орай, сол кездегі құжаттардың өртеніп кетуіне байланысты дәл осы бір саяси сәтті растайтын нақтылы құжат қолымызда болмай отыр. Жоғарыдағы әңгіме «осылай болды-ау» деген біздің болжамымыздан туған ой.

Ең алғаш, 1940 жылдың 1 қарашасында «Большевик туы» деген атаумен шыға бастаған газет кешегі отызыншы жылдардың ойраны мен қан кешу қасап заманның қырқыншы жылдарын, одан кейінгі күйреген шаруашылықты қайыра көтеру һәм бесжылдықтар белесіне қадам жасау уақыты тудырған талаптар мен міндеттерді біркелкілігіне қарай жинақтап, бірінші кезеңі деуге болар еді.

Ұлытау өңіріндегі тұңғыш қазақ газетінің жарық көруі оңай болмаған. Газеттің жұмысын нығайтуға іскер партия, совет қызметкерлері жіберіледі. Газеттің алғашқы нөмірінің жарық көруіне аудан тұрғындары мен зиялы қауым, партия мүшелері көп көмегін тигізген. Кейіннен бұл азаматтар газет жұмысына белсене араласып, жылдар бойы редакция алқасының тұрақты мүшесі болған. Газет сол кезде жүргізілген саясатқа сәйкес партия алға қойған міндеттерді шаруаларға өз тілінде кең жеткізіп, оның айбынды үгітшісі бола білген.

Газеттің шартты түрдегі екінші кезеңі – жетпісінші жылдардың басы мен тоқсаныншы жылдардың соңын қамтыды. 1973 жылы «Ұлытау өңірі» деген атпен шыққан газетке арнайы білімі бар журналистер келіп, коммунистік партияның «жарқын болашаққа» шақырған қызыл ұрандарына өздері сеніп, өзгелерді де сендіруге ынтасымен қызмет етті.

Үшінші мыңжылдықтың табалдырығын «Ұлытау» деген атаумен аттаған аудандық газет бүгінде жаңаша сипатта жұмыс істеп, егемен елдің бір бөлшегі — Ұлытау ауданының жылнамасын жаңа үлгіде түзіп жатыр. Бұл – газет тарихының үшінші кезеңі.

Ізтай БЕЛГІБАЙҰЛЫ