Электр жарығы бар елдің – көңілі жай

Қазіргі таңда қаланың да, ауылдың да тыныс-тіршілігін электр энергиясынсыз көзге елестету еш мүмкін емес. Өйткені, күнделікті қолданыстағы тұрмыстық құрал-жабдықтардың өзі түгелдей дерлік ток көзіне тәуелді. Технологияның барынша дамыған заманында, электр энергиясының адамзат баласының өмірдегі басты қажеттілігіне айналғаны ақиқат. Үйіңізде бір күн жарық жанбаса-ақ берекеңіз кетеді емес пе?! Электр энергиясының тұрмыста атқармайтын қызметі жоқ десек, артық айтпағанымыз. Сондықтан да, халық үшін ауадай қажет электр энергиясы саласында еңбек етіп жүрген жігерлі жандардың еңбектері қашанда жоғары бағаланады.

ҚР Тұңғыш Президенті Н.Назарбаевтың 1998 жылғы 20 қаңтардағы №3827 Жарлығы мен оған 2003 жылы 15 қарашада енгізілген өзгерістерге сәйкес заңды түрде белгіленген ұлттық, мерекелік және кәсіби мерекелер тізімінде, желтоқсан айының үшінші жексенбісі – Энергетиктер күні болып белгіленді. Содан бері еліміздің энергетика саласы қызметкерлері, өздерінің кәсіби мерекелерін атап өтіп келеді.

Таулы өңірдің халқын бүгінгі таңда «Казэнергоцентр» ЖШС-і электр энергиясымен қамтамасыз етіп отыр. Оған дейін аудан тұрғындары «Жезказганэнергосбыт» ЖШС-і тасымалдаған электр энергиясын тұтынған болатын. «Қазаншының еркі бар, қайдан құлақ шығарса» демекші, бұл монополистік компаниялар болып саналатын мекемелер, елге өз айтқандарын орындатып отырғаны жасырын емес. Халық қандай тариф қойса да, лажсыз көнеді. Әрине, ірілі-ұсақты апаттарсыз өндіріс болмайтыны белгілі. Осындай шақта, ауданның көпсалалы коммуналдық шаруашылығы мекемесі өз әлдерінше ақауларды қалпына келтіріп жүр. Электр желілерінің ескілігі, кәсіби электрмонтерлардың жоқтығы, т.с.с. олқылықтардың орны толып жатса, нұр үстіне нұр болар еді. Ауыл тұрғындары, әсілі, электр жарығы мен ауызсу, жол қатынасы болып тұрса, басқа ештеңе сұрамайтыны анық! Тұтынушыларды электр энергиясымен қамтамасыз етуге шектеу қойылған (белгілі бір уақытпен ғана берілген), көше-көшені кезекпен жарықтандырған жылдарды да бастан кешкен ауыл тұрғындары. Қазіргі күнімізге «тәубе» дейік, ағайын!

Ауданымызда халықты электр энергиясымен қамтамасыз етуде ерен еңбек үлгісін көрсете жүріп, зейнетке шыққан Қ.Бекілдеков, Қ.Оралбаев, Б.Аяшев, А.Торғаев сияқты энергетика саласының майталмандары бар қатарымызда. Энергетика ардагерлері өз білгендерін кейінгі толқын жастарға үйретуден жалыққан емес. Олардың ізбасарлары Қ.Иманғожин, Қ.Үсенов, С.Өмірбаев, т.б. осы салада жемісті еңбек етіп жүр бүгінде.

Біз, аудан тұрғындары атынан, энергетика саласы еңбеккерлерін келе жатқан кәсіби мерекелерімен құттықтаймыз. Отбастарына амандық-саулық, ұзақ та қызықты ғұмыр, молшылық тілейміз.

Мереке құтты болсын!

Рахымжан ӘДЕНҰЛЫ