Даярлық – тыңғылықты

Таулы өңір – Ұлытау ауданында су тасқыны орын алуы мүмкін ауылдар баршылық. Сол себепті, аудан әкімінің өкімімен арнайы іс-жоспар бекітіліп, су тасқыны кезінде халықты және аумақты қорғау жұмыстары жүргізіледі. Біз биылғы дайындық жайын тереңірек білу мақсатымен ауданның төтенше жағдайлар бөлімінің бастығы, азаматтық қорғау майоры Нұрбек САБАҒАНОВҚА хабарласқан едік.

– Қазір жұмыс қарқынды жүргізіліп жатыр. Су басу қаупі бар, өзендер мен тоғандарға жақын орналасқандар – Жыланды, Қарсақбай, Бозтұмсық елді мекендері. Барлық ауылдар мен кенттер тұрғындарын, малдарын төтенше жағдай туындағанда қауіпсіз жерге жедел шығару жоспар-сызбалары жергілікті әкімдермен келісіліп, бекітілген. Барлық өзен-тоғандардың жағдайлары – бақылауда. Қолда 15 дауысзорайтқыш құрал бар. Ұлытау селосы мен Жезді, Қарсақбай кенттерінде электрдабылдағыш орнатылған. Тасжолдардағы көпірлер мен суағарлар қар-мұздан, қоқыстан тазартылды. Елді мекендерден 30 440 шаршы метр қар сыртқа шығарылды. «Ұлытау» газетінде халықты ақпараттандыру материалдары жарияланып, аудан әкімдігінің сайтында, аудандық төтенше жағдайлар бөлімінің блогында жадынамалар орналастырылды. 3000 қап, 270 тонна инертті материалдар, 2 тонна азық-түлік және 8 тонна жанармай қоры дайындалды. Аудандық кәсіпкерлік бөлім тиісті ұйымдармен 15 келісім-шарт жасасты. Бұл мақсатқа 28 млн. 117 мың теңге қарастырылған. Қажетті кезде дұрыс әрекет етуді үйрететін 6 421 жадынама таратылды, – деді бізбен әңгімесінде Нұрбек Төлешұлы.

Рахымжан ӘДЕНҰЛЫ