БІЛІМ САЛАСЫ БАСШЫЛАРЫ аудандық басылымға тегін жазылым ұйымдастырады
Ұлытау ауданындағы білім беру саласына тікелей қатысы бар мекемелер басшылары «Ұлытау» газеті – әр шаңыраққа!» акциясына нақты іспен қолдау көрсетпекші. Бұл туралы аталған басылымның бас редакторы Ахат ҚҰРМАНСЕЙІТОВТІҢ білім және тәрбие ошақтарының басшыларымен мақсатты кездесуі кезінде аудандық білім бөлімінің басшысы Бағдат ӘБДІРАЙЫМОВ мәлімдеді.
Аудандық білім бөлімінде барлық санитарлық талаптарды сақтай отырып өткізілген жылыжүзді жүздесу барысында аудандық газеттің бас редакторы алдағы жылы басылым тарапынан оқырманға ұсынылуы жоспарланған тың жаңалықтар жайлы жан-жақты әңгіме өрбітті. Өңірдегі жалқы баспасөз құралының бүгінгі бет-бейнесі мен ұстанған бағдарына қатысты білім саласы басшыларының пікірі аса маңызды екенін ерекше атап өтті. Ұстаздар қауымына бар жан-дүниесімен етене жақындығы әр сөзінен айқын сезіліп тұрған аудан журналистерінің қазіргі таңдағы жетекшісі келесі жылы білім беру-тәрбие мекемелерімен бірлесе қызмет етудің екіжақты тиімді тәсілдерін атап өтіп, бұл қадамның қоғам үшін қайтарымы мол боларына назар аударды.
Ол сонымен қатар, ерте бастан оқырман сүйіктісіне айналған облыстық «Орталық Қазақстан» газетінің айтары айшықты, қауқары аса қуатты басылым екендігіне екпін беріп, ұстаздарды алдағы жылы аталған ақпарат құралынан қол үзбеуге шақырды.
Әңгіме барысында қос тарап арасында терең түсіністік ахуалы орнығып, біршама тиянақты тұжырымдар жасалды.
Кездесудегі қорытынды сөзінде аудандық білім бөлімінің басшысы Бағдат Әбдірайымов әріптестеріне «Ұлытау» газеті – әр шаңыраққа!» акциясы аясында өз қаражаттары есебінен көпбалалы және аз қамтамасыз етілген отбасыларды жергілікті басылымға тегін жаздырып беру жөнінде ұсыныс жасады. Өзі 5 отбасының «Ұлытау» газетін жыл бойы тегін жазылым негізінде оқуын қамтамасыз ететінін мәлімдеді. Бағдат Қабденұлының ұсынысына толық қолдау білдірген мекемелер басшыларының әрқайсысы жоғарыда аталған санаттағы азаматтарға 3 данадан тегін жазылым ұйымдастыру жөнінде бәтуаласты.
Тәслима ОРАЗАЛЫҚЫЗЫ
