БІЛІМ КӨШІ – БИІК САТЫДА

26.12.2023

Жезқазғандағы №3 «Білім-инновация» лицей-интернатында информатикадан халықаралық XV Еуразиялық олимпиадасының, INFOMATRIX-ASYA халықаралық жобалар байқауының және колледж студенттері арасында өткен WORLDSKILLS-2023 республикалық чемпионатының жүлдегерлерін марапаттауға арналған іс-шара өтті.
Байқау жеңімпаздары мен жүлдегерлерін Ұлытау облысы әкімі аппаратының басшысы Абзал Жайлыбаев марапаттады.

225 оқушы бақ сынасқан Халықаралық ХІV Еуразиялық олимпиададға Ұлытау облысынан 2 оқушы қатысты. БИЛ №3 оқушылары Жаңаберген Абдуррошид пен Баянғазы Темірлан күміс медаль иеленді. Оқушыларға 100 мың теңге ақшалай сыйлық табысталды.

“INFOMATRIX-ASIA” халықаралық компьютерлік жобалар конкурсында 1-орын алған командаға (Ербол Исмаил, Сералы Мадияр, Әбдіқалық Нұрдәулет) 200 мың теңге ақшалай сыйлық табысталды.

3-орын алған екі команданың әрқайсысына (Жанділда Ербұлан, Құрманбек Бекқожа, Сыздық Әлішер, Болат Дәулет, Амзе Ернұр, Ескендір Ибрахим) 100 мың теңге ақшалай сыйлық табысталды.

«WorldSkills-2023» республикалық чемпионаты
2023 жылдың 19-27 қараша күндері аралығында EXPO Халықаралық көрме орталығында WorldSkills-2023 республикалық чемпионаты өтті. Чемпионатқа Ұлытау облысынан 19 құзыреттілік бойынша 19 студент,19 сарапшы қатысты.

«Плиткамен қаптау» құзыреттілігі бойынша Жезқазған жоғары политехникалық колледжінің студенті Әшірбеков Сүйініш (жетекшісі Батырбаева Назерке Арыстанбекқызы) қола медальмен марапатталды. Қола медаль иеленген студентке 50 мың теңге ақшалай сыйлық табысталды.

«Визуалды мерчендайзинг» құзіреттілігі бойынша Жезқазған индустриалдық-гуманитарлық колледжінің студенті Аханова Ақжан (жетекшісі Ерманова Еркеназ Нуркешовна) және «Сән технологиясы» құзіреттілігі бойынша Жезқазған бизнес және көлік колледжінің студенті Үсен Айнагүл (жетекшісі Тукенова Мадина) медальонмен марапатталды және екі студенттің әрқайсысына 25 мың теңге ақшалай сыйлық табысталды.