Аяулымның жеңісі – еңбегінің жемісі

Республикалық «Үздік педагог — 2021» байқауының облыстық кезеңіне Қарсақбай агротехникалық колледжінің оқытушысы Аяулым Каһарман қатысып қайтты. Бұл байқауға облыстан 76 ұстаз қатысқан екен. Оның ішінен 14 ұстаз жеңімпаз атанды. Солардың қатарында Аяулым да болып, облыс әкімі Жеңіс Қасымбектің қолынан «Үздік педагог — 2021» байқауының дипломын алды.

Бұдан кейін жүлдемен оралған үздік педагогті бізде әңгімеге тартқан едік.

– Бұл марапатым менің ғана жеңісім емес. Өз ұжымымның және шәкірттерімнің жеңісі деп білемін. Өйткені, байқаудың аты байқау. Топтың арасынан озып шығу оңай емес екені белгілі. Осындай тамаша сәтті пайдалана отырып, ұжымыма, шәкірттеріме алғысымды білдіргім келеді. Әр мұғалімді кәсіби мерекесімен құттықтаймын. Отбастарына амандық, дендеріне саулық тілеймін, — деді өз әңгімесінде.

Аяулым Қаһарман білім беру саласында 15 жылдай еңбек еткен тәжірибелі мұғалім. Оның айтуынша, өз оқу орнында елін сүйетін тәрбиелі, зерек шәкірт дайындап шығару басты орында.

Біз де Аяулымды жеңісімен құттықтап, жастарды тәрбиелеу жолында аянбай еңбек етуіне сәттілік тіледік.

Жасұлан АЯШЕВ