Атқарылған жұмыстар бағамдалды
Жұмыс сапарымен Сарысу ауылдық округіне барған аудан әкімі Советбек МЕДЕБАЕВ ауыл ахуалымен танысуды орта мектепті аралап көруден бастады. Білім ошағы уақыт талабына сай жабдықталып, жаңғыртылған. Оқушыларға барлық жағдай жасалған. Бұдан соң аудан басшысы ауыл емханасында болып, ақ халатты жандармен пікірлесті. Бір қуанарлық жайт – ауыл тұрғындары вакцина алу бойынша белсенділік танытуда.
Сапар барысында Советбек Тұрсынұлы былтырғы жылы күрделі жөндеуден өткен мәдениет ошағында болды. Клубтың іші-сырты, шатыры, есік-терезелері толығымен жаңартылған. Ауыл тұрғындары атқарылған іске дән риза.
Аудан басшысы осы жердеауыл тұрғындарымен кездесті. Басқосуда алдағы уақытта ауыл көлемінде атқарылатын жұмыстар айқындалды. Әсіресе, электр энергиясы мен ауызсуға байланысты жасалынатын жұмыстар нақтыланып, міндеттер белгіленді. Сондай-ақ, аудан басшысы «Ауыл – ел бесігі» бағдарламасы аясында көшелердегі, ауыл ішіндегі жолдарға асфальт төселіп, Сарысу-Жезқазған бағытындағы 20 шақырым көлік жолы жөнделетінін тілге тиек етті. Тұрғындар тарапынан туындаған өзге де сауалдарға жауап берді.
Аудан басшысы жергілікті халық көтерген жайттардың барлығы дерлік назарға алынатынын айрықша атап өтті. Жарық беру мен ауызсуға байланысты мәселені ретке келтіруді аудандық тұрғын үй-коммуналдық шаруашылығы, жолаушылар көлігі, автомобиль жолдары және тұрғын үй инспекциясы бөлімінің басшысы Болатбек Есназаровқа тапсырды.
Жасұлан АЯШЕВ
