Қарағандылық жас суретшілер республикалық байқауда жүлделі орындарға ие болды
«Бояулар құпиясы» республикалық жас суретшілер байқауының қорытындысы шығарылды. Қарағанды облысынан сегіз суретші қатысып, олардың екеуі жүлделі орындарға ие болды.
Биылғы жылы байқау Қазақстан Тәуелсіздігінің 30 жылдығын мерекелеу аясында өткізілді – жас суретшілер «Тәуелсіз Қазақстан – балалар көзімен» ұранымен жұмыстарын ұсынды.
Байқауға 136 бала қатысты.
– Республикалық кезеңнің қорытындысы бойынша Жезқазған Балалар өнер мектебінің сегізінші сынып оқушысы Аяла Қуаныш «Жас суретші» номинациясында бірінші орынға ие болды. Ал Қарағандының №2 лицейінің оқушысы Яна Иваночкина «Коллажда» екінші болды, – деді «Сарыарқа дарыны» балаларға арналған қосымша білім беру аймақтық ғылыми-практикалық орталығының әдіскері Гүлназ Мананбаева.
Байқау жеңімпаздары дипломдар мен сыйлықтармен, жетекшілері алғыс хаттармен марапатталды.
«Бояулар құпиясы» байқауы жыл сайын өткізіледі, ұйымдастырушы – ҚР БҒМ ҚББРОӘО.
