Қарағанды облысында балаларды тәрбиелеуден жалтарғаны үшін 900-ден астам ата-ана жауапқа тартылды

Қарағанды облысында ата-ана міндеттерін атқармайтын 899 адам анықталды. 923 ата-ана балаларды тәрбиелеуден жалтарғаны үшін әкімшілік жауапкершілікке тартылды. Балалар қауіпсіздігі мәселесі облыс әкімдігі жанындағы Құқық бұзушылықтардың алдын алу жөніндегі ведомствоаралық комиссияның онлайн-отырысының басты тақырыбына айналды.

Кеңес барысында Комиссия мүшелері кәмелетке толмағандар арасында жыныстық қолсұғылмаушылық пен суицидке қарсы қылмыстарды болдырмау жөніндегі жұмысты ұйымдастыруды талқылады.

Осылайша, ағымдағы жылдың желтоқсан айынан бастап Бас прокуратура балалардың жыныстық қол сұғылмаушылығына қарсы істерді тергеуге ерекше қадағалауды жүзеге асыру тәртібін белгіледі. Бірақ полиция мен білім беру ұйымдары арасындағы бірлескен жұмыс болмаса, қажетті нәтижеге жету мүмкін емес. Отырыста қолайсыз отбасылар туралы мәліметтер алмасуды автоматтандыру процесін аяқтау ұсынылды.

Сондай-ақ, оқушыларға сауалнама жүргізу мәселесі көтерілді. Бұл іс-шара балалардың құқықтарын қорғау бойынша профилактикалық жұмыс жоспарына кіреді. Биыл қамту 51%-ды құрады, яғни 104 322 оқушы.

Қарағанды облысы полиция департаментінің бастығы Ерлан Файзуллин мамандарды тарта отырып, топ құру және сауалнама жүргізу үшін сұрақтар құрастыруға таңдау жасау туралы ұсыныс білдірді.

Биыл еріктілермен бірлесіп балаларға қатысты заңсыз әрекеттерді анықтау бойынша 1 000-нан астам рейд ұйымдастырылды. Сондай-ақ, «Шанс» әлеуметтік-психологиялық қолдау орталығымен меморандумға қол қойылды. Мұнда қиын өмірлік жағдайға тап болған жасөспірімдерді оңалту жүргізіледі. Мұндай орталықтар облыстың басқа қалалары мен аудандарында қажет.

2017 жылдан бастап облыстың білім беру ұйымдарының әлеуметтік желілерінде балалардың қауіпсіздігін қамтамасыз ету үшін «Интегро» интернет-сайттарының автоматтандырылған мониторинг бағдарламасы орнатылды. Осы жылы «Суицидтердің алдын алу» жобасы өз жұмысын бастады, оған білім беру қызметкерлері қатысады. 2018 жылдан бастап балаларға әлеуметтік, психологиялық және консультациялық көмек көрсету үшін тәулік бойы тегін сенім телефоны жұмыс істейді-8-800-004-00-50. Тек осы жылдың өзінде 300 кәмелетке толмаған балаға көмек көрсетілді.

Білім басқармасы тарапынан психологиялық көмекті күшейту мақсатында «Мектеп қауіпсіздігі командасы» құрылды. Девиантты мінез-құлықтың алдын алу үшін Bilimal бағдарламасында «әлеуметтік педагог» модулі ашылды, онда есепте тұрған тұрмысы нашар отбасылар мен жасөспірімдер бойынша деректер көрсетілген.

Өңір басшысы Жеңіс Қасымбек қалалар мен аудандардың әкімдеріне, сондай-ақ осы салаға жауапты барлық тұлғаларға балалардың қауіпсіздігі мәселелеріне жауапкершілікпен қарауды ұсынды.

— Қаңтар айының соңына дейін проблемалық аудандар, әсіресе Нұра және Бұқар Жырау аудандары бойынша кәмелетке толмағандардың істері жөніндегі комиссияның бірнеше отырысын дайындауды тапсырамын. Оларға қалалар мен аудандардың әкімдері, аудандық және қалалық полиция, білім беру бөлімшелері қатысуы тиіс. Мәселені шешу жолдарын бірге іздеу керек. Жүйелі көзқарас қажет, — деп атап өтті Жеңіс Қасымбек.