Қарағанды облысында ауыл әкімдерінің сайлауын тәуелсіз бақылаушылар қадағалайды
Қарағанды облысындағы партиялық емес бақылау орталығының аймақтық филиалы 500-ге жуық тәуелсіз бақылаушы дайындады. 25 шілде, ауыл әкімдерін сайлау күні олар сайлау учаскелерінде болады және дауыс беру процесін, нәтижелердің жүргізілуін қадағалайды.
– Елімізде алғаш рет ауыл әкімдерінің тікелей сайлауы өтеді. Сайлау процесінің ашықтығы мен заңдылығын бақылау үшін өңірлердегі филиалдарымен «Партиялық емес бақылау орталығы» республикалық қоғамдық бірлестігі құрылды. Қарағанды облысында 500-ге жуық тәуелсіз бақылаушыны оқыту ұйымдастырылды, – дейді партиялық емес бақылау орталығының облыстық филиалының төрағасы Сұлтан Шәймағанбет.
Ол тәуелсіз бақылаушылар сайлауды әділ және ашық өткізуге өз үлестерін қосатынына сенім білдірді.
Естеріңізге сала кетейік, Қарағанды облысында ауыл әкімдерінің алғашқы сайлауы 25 шілдеде 149 елді мекенде өтеді. 75 орынға 268 үміткер үміткер: 81 – саяси партиядан және 187 өзін-өзі ұсынған. Болашақ ауыл басшысына 81 мыңнан астам сайлаушы дауыс бере алады.
Дереккөз – Қарағанды облысының әкімдігі
