Шеңберде – жаңа спорт алаңы

Шеңбер ауылдық округінде бұқаралық спортты дамыту, салауатты өмір салтын қалыптастыру, ұлт саулығын сақтау бағытындағы бетбұрыс бар екені айқын аңғарылады. Округ орталығында жуырда ғана жинақы түрде орнатылған көшедегі жаттығу қондырғылары – соның айғағы. Сонымен қатар, балаларға арналған ойын алаңы да бүлдіршіндер игілігіне беріліп отыр.

Жаттығу және балғындардың ойын алаңы уақыт талабына лайықты қондырғылармен жабдықталған. Сырты қоршалып, балалар жарақат алмауы үшін арнайы құм төселген.

– Жаңа спорт алаңын орнату мәселесі жергілікті қауымдастық өкілдерімен кеңесе отырып, «Қатысу бюджеті» бағдарламасы аясында жүзеге асырылды. Осы арқылы ауыл жастары спортпен шұғылданып, бос уақыттарын тиімді пайдалануға мүмкіндік алды. Ал, балалардың ойын алаңқайы бүлдіршіндерді мәз-мейрам еткенін көріп, ерекше сезімге бөлендік. Бұл жетістікті басқа да іргелі істер секілді ел Тәуелсіздігінің 30 жылдығы қарсаңында халыққа жасалған толымды тарту деп қабылдаған жөн,– дейді ауыл әкімі Сағат Сұлтанов.

Алаңның салтанатты ашылу рәсімінде сөз алған ауыл тұрғыны Сәкен Найманбаев жерлестерін аса қажетті нысанның қолданысқа берілуімен құттықтап, жергілікті атқарушы билікке алғысын білдірді.

Жасұлан АЯШЕВ