Қыр астында қарбалас шақ басталады
Биылғы көктемнің әдеттегіден ертерек келуіне байланысты, көктемгі дала жұмыстарына даярлық та ерте басталды. Ауданымыздың диқандар қауымы көктемгі егіс науқанына тыңғылықты дайындалуда. Сапалы тұқым – бітік егін кепілі десек, диқандарымыз да тұқым сапасына көп көңіл бөліп отыр. Оның сыртында дала жұмысына қатысатын арнайы техникаларын сақадай сай ету, жанар-жағар май қорын қамдау, жерді құнарландыру үшін қолданылатын арнайы минералды тыңайтқыштар мен егін зиянкестеріне, арамшөптерге қарсы қолданылатын гербицидтер алуға жұмыс жүргізуді қолға алды. Біз ауданның көктемгі дала жұмыстарына даярлығы жайлы білмекке, аудандық ауылшаруашылығы бөлімінің бастығы Сағади Сайлауұлы ОБАЙДУЛЛИНГЕ сауал жолдаған едік…
– Аудан бойынша өсімдік шаруашылығымен 37 шаруа қожалығы айналысады. Жоспар бойынша биылғы жылы 26,0 мың гектар жерге тұқым сіңіріледі. Мұның сыртында 43 гектарға картоп, 12 гектарға көкөніс егіледі. Аудан диқандары биылғы егіс науқанына 2600 тонна тұқым (2000 тонна бидай, 600 тонна арпа) дайындады. «ҚазАгрЭкс» АҚ сараптама зертханасында сараптамадан өткен 2600 тонна тұқымның шығымдылығы 96% құрады. Ауданның шаруа қожалықтары минералды тыңайтқыштар мен өсімдік қорғау құралдарын алуда белсенділік танытуда. «Жөкебаев О», «Бекетай-баба», «Умирбеков О», «Айтуғанов Б», «Сұңғат», «Кеңгір» шаруа қожалықтары қажетті сапалы тұқым мен тыңайтқыштар қорын жасап алды деуге де болады. Жанар-жағар майға келетін болсақ, биыл да «ГазOilПРОМ kz» ЖШС оператор болып танылып, ауданның 11 шаруа қожалығы – 313 тоннаға сұраныс беріп отыр. 6 шаруа қожалығы – 98 тонна, 3 шаруа қожалығы – 85 тонна дизель отынын алуға келісімшарт жасады. Ауданға, жалпы 600 тонна жанар-жағар май бөлінді. Қазіргі таңда арзан бағамен жанар-жағар май алып, жеткізу жұмыстары жалғасуда. Биылғы көктемгі егіс науқанына арнайы ауылшаруашылығы техникаларын дайындау жұмыстары да қарқынды жүргізілді. Науқанға қатысатын 83 дана техника қазіргі таңда сақадай-сай. Биылғы егін егу жұмысына 62 дана қуатты «К700», «К-701» тракторлары, «Джон Лир» және «Кейс» комбайндары бір-бір данадан, 19 дана ДТ «Қазақстан» шынжыртабанды тракторлар, 140 дана дән сепкіш, 3 дана егін себу кешені жұмылдырылмақшы. Мемлекет тарапынан көктемгі дала жұмыстарын қаржыландыру мақсатында айтарлықтай жұмыстар жүргізілуде. Мысалы тұқым шаруашылығын дамытуды, гербицид, пестицидтердің және тыңайтқыштардың құнын (органикалық тыңайтқыштарды қоспағанда) субсидиялау бағытында жүйелі жұмыстар бар. Көктемгі дала жұмыстары, сәтін салса, 10 мамыр – 5 маусым аралығында аяқталады деп жоспарланып отыр, – дейді Сағади Сайлауұлы біздің берген сауалымызға.
Қыр астындағы қарбалас шақ басталатын күн де жақын. Аудан диқандарының жауапты науқанға даярлығы ауданның ауылшаруашылығы бөлімі бастығының айтуынша, тиянақты сияқты. Әйтседе, егіннің бітік шығуы – ауа райына да тікелей байланысты болатыны тағы бар. Недегенмен, «балапандарды күзде санайды» демекші, нәтижені берекелі күзде көретін болармыз.
Рахымжан ӘДЕНҰЛЫ
