Бұқаралық спортты дамыту – басты назарда
Аудан басшысы Советбек МЕДЕБАЕВ аудан әкімдігі мәслихатының кіші залында аудандық спорт саласының басшыларын, мамандарын және спорт жанашырларын қабылдап, олармен кездесу өткізді. Оған осы салаға қатысты аудан әкімінің орынбасары Алмаз ҚАЙЫРБЕК, аудандық дене шынықтыру және спорт бөлімінің басшысы Марат ОРАЗАЛИН, аудандық спорт мектебінің директоры Марғұлан Сәбденов, жеке бапкерлер құрамы қатысты.
Алдымен, аудандық спорт бөлімінің басшысы Марат Оразалин атқарылып жатқан жұмыстарға тоқталып, алда атқарылатын жұмыс жоспарын баяндады.
Бұдан кейін аудан басшысы Советбек Тұрсынұлы бірінші кезекте, балалар спортын дамытып, оларға көңіл бөлу керектігін айтты. Оның ішінде ауыл спортын дамыту бойынша сала басшыларына нақты тапсырмасын берді. Сондай-ақ, аудан әкімі өз сөзінде спортшыларға бар жағдай жасап, жиынға қатысушыларды алдағы уақытта бірлесе жұмыс жасауға шақырды.
Кездесуге қатысушылар тарапынан аудан спортын дамыту бойынша нақты жұмыс жоспары керектігін, күрес пен бокстан басқа да спорт түрлеріне көңіл бөліну керектігін сұрап, өз ұсыныс-пікірлерін білдірді.
Жиын соңында аудан басшысы аудан спорты бойынша бір жылдық жұмыс жоспарын бекітіп, оны қадағалауды орынбасары Алмаз Қайырбекке тапсырды.
Жасұлан АЯШЕВ
