Құрметті аудан тұрғындары!
Сіздерді Қазақстан Республикасы Конституциясы күнімен шын жүректен құттықтаймыз!
Конституция күні – біздің мемлекетіміздің халқымыздың ең ұлық мерекелерінің бірі. «Көптің сөзі – киелі» – дейді дана халқымыз. Ел-жұрттың талқысынан өтіп, таңдауына айналған басты құжатымыздың авторы – бүкіл Қазақстан.
Биыл Қазақстан Республикасының Конституциясына 30 жыл толып отыр. Осы аралықта Қазақстанның Ата Заңы өзінің талабына лайықты екенін көрсетті. Бүгінгі таңда жаңартылған Конституция негізінде жаңа құқықтық жүйе қалыптасты. Қабылданған заңдар қоғамдық қатынастардың негізгі жақтарын реттеп, еліміздің әлемдік деңгейдегі орнын жоғарылатуда. Республиканың көпұлтты халқының достығын нығайту мен қоғамдық келісімді қамтамасыз етуде Конституцияның рөлі зор. Мұның бәрі Конституцияда бекітілген республика қызметінің түбегейлі принциптерін қоғамдық және саяси өмірде нық ұстанудың нәтижесі.
Еліміз Конституциялық қағиданы берік ұстану арқылы заңнаманың қызмет аясын кеңейтіп, құқықтық мемлекет пен азаматтық қоғамның үйлесімді де ырғақты дамуына даңғыл жол ашты. Қазақстанның әрбір азаматы еліміздің негізгі Заңының асқақ рухы мен маңызын, оның қалыптасу тарихын жақсы білуі керек. Сондықтан, оны ардақтау – әрбір азаматтың асыл парызы.
Сіздерді айтулы мерекемен тағы да құттықтай отырып, әр шаңыраққа құт-береке, ырыс пен ынтымақ, отбасыларыңызға амандық тілейміз.
Аманжол МЫРЗАБЕКОВ,
Ұлытау ауданының әкімі.
Ахат ҚҰРМАНСЕЙІТОВ,
аудандық мәслихаттың төрағасы.
