Биыл Жезді кентінде қандай жұмыстар атқарылады?
Бүгін аудан әкімі Аманжол Мырзабеков Жезді кентіне жұмыс сапарымен барып, кент активімен жүздесті. Жүздесу барысында аудан басшысы Жезді кентінде атқарылатын жұмыстарға тоқталып, жиынға қатысушыларды бірлесе жұмыс жасауға шақырды. Кент активі аудан әкімін бірауыздан қолдап, өз ұсыныс-пікірлерімен бөлісті.
Биыл жыл соңына дейін кент орталығында салынып жатқан спорт кешенінің құрылысы толық аяқталады. Сонымен қатар, кенттегі аурухананы күрделі жөндеуден өткізу жұмыстары да мәресіне жетіп, ел игілігіне берілуі керек. Бұдан бөлек, облыстық бюджет есебінен Көкбұлақ көшесінің бастауы мен Сәтбаев көшесіндегі автокөлік көпіріне дейінгі үлкен Жезді өзенінің 2 шақырымына тазалық жұмыстары жүрігізілмек.
Кенттегі Тоқтыбаев, Бұлқышев көшелеріндегі кәріз жүйесіне ағымдағы жөндеу жұмыстарын жүргізу, Иманжанов көшесіндегі ауыз су құбырын жаңарту, жаңар-жағармай бекетін салу жұмыстары жоспарланғанын да айта кету керек.
Кездесу барысында аудан әкімі жеке инвесторларды тарту арқылы кент орталығында жаңадан 5 баспана салу жоспарланып отырғанын да жеткізді. Қазіргі уақытта қажет жері телімі рәсімделіп, құрылыс жұмысын бастауға әзірлік жұмыстары жүргізілуде.
Жиын барысында Аманжол Батырбекұлы 2023 жылғы 27 қаңтардағы ҚР Президенті Қасым-Жомарт Тоқаевтың Жарлығы негізінде көп балалы ана Гүлжазира Зейлғазинаға «Күміс алқа» табыстады. Сондай-ақ, кент тұрғындары Шолпан Әбдібекова мен Оразбай Ермағамбетов аудан әкімінің Алғыс хатына ие болды. Жиынға белгілі себептерге байланысты қатыса алмаған Оразбай Ермағамбетовтың марапатын кент әкімі Мұратбек Жұмабеков табыстайды.
